Herlege mellomjul!

Det er så godt med juleferie! Litt (eller; VELDIG) spesielt var det i år, då me ikkje hadde ein einaste unge på julaften, men det vart då vellukka likevel. Tor Inge og eg var på Inderøya i lag med mamma og Oddvar på julaften, og me storkosa oss alle saman. Etterpå gjekk dagane "slag i slag" med vitjingar her og der, og fjerde juledag fekk Tor Inge heim sine to minste, og femte juledag kom Hulda og Even, så då vart alt på skikk att.

I morgon kjem Tor Inge og ungane hit og feirar treårsdagen til Even, før me skal til syster hans og ete kalkun og sjå på rakettar. Og 1. nyårsdag vert det kombinert 3- og 7årsdag med familie og slekt.

Juleferie!!

Som vanleg vart førjulstida meir stressande enn eg trudde ho skulle bli, men no har eg diverse julekaker i boks, og stort sett oversyn over kva eg har eller ikkje har. Har vaska og styra litt i dag, så det vert nok jul i år òg. :)

Praksis på sjukehus

No har eg vore i sjukehuspraksis i to veker, og eg stortrivast! Eg er på hjarteavdelinga på Medisin B, og kvar dag er like spennande og interessant. Eg byrjar få taket på puls, blodtrykk og temperaturmålingar, eg kan samtala med pasientane utan å vere redd for å seie dumme eller gale ting, og eg er ganske godt kjent i avdelinga no. Frametter vert det mykje oppgaveskriving og slikt, men me er heldige og får juleferie allereie 16. desember.

Tannverk

Det finnast ikkje noko verre enn tannverk!Det heile byrja onsdag kveld (det vil seie, det byrja vel tidlegare, for eg har trass alt kjent det ei stund ...), og torsdag hadde eg så vondt i underkjeven på venstre side at eg trudde eg skulle døy. Vegleiaren min på praksisplassen fekk meg til å ringa til ulike tannlegar på levanger, og hjå den tredje fekk eg napp, og time fredag klokka 10:30.

Då tannlegen hadde bora og kika og pirka i tanna mi og teke røntgenbilete, fann han ut at det var ei gamal rotfylling som var problemet. Det er verk under den tanna, og i fyrste omgang fekk eg penicillin og paralgin forte. Så i dag ser eg ... eh ... interessant(?) ut, med ei hoven venstre side av andletet, men det er mindre smertefullt, og eg gler meg til neste tannlegetime.

Ei herleg helg!

Denne helga har vore ei "oppladingshelg" av dei store! Etter ei stressande veke med sjuke ungar, og før eg skulle ut i praksis, var det Store Målet for helga å slappa av.
Fredag var Tor Inge på arbeid til klokka 20. Då han kom hit, hadde eg laga Super Nachos (takk, Lasse!) og guacamole (takk, Stian!). Mannen vart glad og mett, og det vart definitivt eg òg.
Helga vart ikkje dårlegare av at min kjære hadde ei overrasking til meg på fredag; han hadde tinga rom på Rica på Hell frå laurdag til sundag, med julebord inkludert. I tillegg hadde me fått badekar på rommet (altso, på badet på rommet, ja ...), så då sundagen kom, var me to mette, reine (veldig reine), utkvilte og glade menneske som køyrde heim for å vere klare for ei ny, travel veke.

Endeleg helg, folkens!

Etter ei lang veke, med ein sjuk son, praksisførebuing på skulen, oppgåveskriving, stress og mas, er det faktisk HELG! No skal eg slappa av og ni-kosa meg. Kanhenda det vert ein tur ut for å handla julegåver i morgon, men stress skal eg ikkje ha noko av.

Spennande tider

No går eg spennande tider i møte. Neste veke byrjar min fyrste sjukehuspraksis, og eg har ikkje peiling på kva eg går til. Det er stort og skremmande med mange utfordringar, som til dømes korleis ein skal rekka over alt, korleis turnusen min vert oppsett, korleis me studentar vert mottekne i avdelinga, og sist men ikkje minst: Greier eg dette? Har eg det som skal til for å vera ein god sjukepleiar? Eg er spent, særs spent. Men eg gler meg litt òg då. :)

Biletetest

Må berre testa korleis det vert med bilete i bloggen, så her kjem ein frå ein tur på Tor Inge sin bursdag. Bursdagsbarnet var fotograf.

Attende

Då var eg attende i bloggeverda. Berre på testestadiet enno, men me får sjå ...