måndag, april 30, 2007

Handarbeidsoppsummering

Eg har ikkje strikka tidlegare, det vil seie; eg har aldri gjort ferdig eit strikkearbeid tidlegare, men no som vi snart skriv mai, er det på tide å ta ei kort oppsummering over kva eg faktisk har strikka i år:
- 4 par ullsokkar
- 3 par vottar
- 1 lue
- 1 par pulsvanter
- 1 veske
- 1 poncho (manglar frynser og trådfesting enno)
- Ullgenser til Hulda
- Ullgenser til Even
- Panneband til Even
- 2 stk Calorimetry til Hulda

Og i skrivande stund har eg både ein genser og firkanttøflar på pinnane. Det har faktisk vorte ganske vanskeleg å sjå TV med hendene i fanget.

Hulda med grøn Calorimetry:

søndag, april 29, 2007

Oppdateringar

Eg freistar oppdatera bunaden på bloggen min i og med at han har vore ganske statisk den siste tida, men eg er slett ikkje viss på at eg får det til slik eg har tenkt.

No er helga forresten snart over, og i morgon skal eg på vegleiing i samband med bachelopoppgåva mi. Eg vonar det eg har gjort til no er brukandes til noko, men eg må innrømma at eg ser litt mørkt på det å skulle presentera noko som så langt frå er ferdig ...

Fotball-cup

I helga har det vore Bend-it-cup i Verdalshallen, og dagen til Hulda vart redda då ho skaut to mål i den siste kampen og laget hennar vann 2-1. Jentungen er ganske ærekjær (er det arveleg tru?), så for "fotballframtida" hennar (og mitt stolte morshjarte) var det ein stor fordel at det vart mål.

Mygg-spelarane har forresten endra seg mykje frå i fjor, i år liknar det definitivt meir på fotball enn det har gjort tidlegare, og innsatsen er på topp til alle spelarane.

onsdag, april 25, 2007

Bacheloroppgåve

I desse dagar skal det skrivast bacheloroppgåva. Eg synast eg tenkjer på oppgåva heile tida, men det er vanskeleg å samanfatta alt og få det ned på data. Eg har til no stort sett ferdigstilt dei to fyrste kapitla; innleiinga og metode-kapittelet. Innleiinga må sjølvsagt reviderast etter kvart, men i grove trekk har eg avgjort innhaldet iallfall. Så no er det berre det verste att; teorigrunnlaget, drøftinga og avslutninga.

Oppgåva skal leverast 31. mai, og, tru meg, det er ikkje så lenge til. Måndag skal eg på vegleiing, så vi får sjå om eg har vorte klokare etter det.

*attende til skrivinga*

(PS: Dersom eg framleis har vener og familie trass i grov vanskjøtsel i laupet av 3 år på skulen: Eg vil gjerne prata med dykk og sjå dykk att etter 31. mai ..!)

måndag, april 16, 2007

Jobbintervju

I dag har eg vore på mitt fyrste jobbintervju nokon sinne. Eg har søkt på stilling som sjukepleiar i Levanger kommune, og kom gjennom nålauget til intervjuet. Eg veit ikkje korleis det gjekk, men i følge intervjuarane (dei var tre!) hadde eg visst klart meg ganske bra. Men eg er usikker påom eg får stillinga, for det var mange godt kvalifiserte søkarar til ho. Vi krysser fingrar!

torsdag, april 12, 2007

Snart sjukepleiar ...

No er eg ferdig med min siste praksis! Hadde sluttevaluering i dag, og dette var faktisk den siste praksisen i heile studiet. Det einaste som står att no, er ein oppgåve relatert til psykiatrien, 4 dagar på skulen og dinest intensiv skriving av bacheloroppgåve.

Eg gler meg eigentleg til å skriva bacheloroppgåva, men samstundes er eg litt nervøs, for eg veit jo ikkje heilt kva som må til for å få den karakteren eg vil ha. Men det er vel berre å brette opp armane og setja i gong. 31. mai er innleveringsdatoen, og etter det skal eg freista finna ut om det er eit liv utanfor HiNT.

måndag, april 09, 2007

Nerd!

Bror min, Lasse, hadde teke ein nerdetest og nyfiken som eg er, måtte jo eg òg gjere det. Resultatet vart skremmande:

I am nerdier than 82% of all people. Are you nerdier? Click here to find out!