måndag, juni 25, 2007

Hyttetur


I helga var vi på hyttetur i Aker Verdal si hytte i Trongsundet i Mosvik. Hytta har åtte sengeplassar fordelt på 3 soverom og i tillegg er det stue, kjøkken eit lite bad og ein romsleg veranda med badestamp med vedfyring. Til hytta høyrer òg ein båt som vi nytta flittig heile helga.




Fredag kveld grilla vi, og her ser de vi et (og et og et). Even var ikkje så veldig interessert i middag; på biletet her, står han i bakgrunnen og grillar Marshmallows.

Det er ganske utruleg kor mykje mat vi greier å pakka i oss, men samstundes er det enno meir imponerande at eg og Tor Inge nesten alltid handlar og lagar dobbelt så mykje som vi eigentleg treng. Men for å seie det slik; dersom vi får uventa besøk, vert nok alle mette likevel! Og elles er vi gode til å ete restemat i etterkant av slike fråtse-måltid.


Even fann seg ein grillspyd som han var heilt overtydd om at skulle brukast til å grilla desserten hans ...







Seinare på kvelden fyra vi i den store badestampen før vi tok ein tur på sjøen og fiska.

Hulda fekk ein diger torsk, bilete av denne kjem seinare, for dei vart teke med Hege sin telefon.

Etter sjøturen var vatnet i badestampen framleis berre 25 grader, men dette skremte ikkje Even som vart fyrstemann uti. Etter å ha sjekka temperaturen, tok han sjansen på å dukka nedi, men han meinte det ikkje var riktig godt og varmt enno då ...










Hulda var ikkje direkte imponert over temperaturen så tidleg, så ho nøyde seg med å vassa litt i fyrste omgang:

Etter kvart som det vart fart på fyringa, vart temperaturen heilt opp på 39 grader, og då var det så varmt at sjølv mor kunne bada!

Det gjorde godt med ei avslappingshelg att, eg trur vi kosa oss alle mann.

Sommartopp i bruk


Her har Hulda teke sommartoppen i bruk. Biletet vart relativt dårleg, men det får gå for denne gongen. Ho vart iallfall kjempefin!!

torsdag, juni 21, 2007

Eksamensresultat

I dag kom resultatet av bacheloroppgåva, og eg fekk B, så eg må nok seie meg nøgd.

No er tre års høgskule endeleg avslutta, og eg er sjukepleiar heilt på ordentleg.

onsdag, juni 20, 2007

Test av kamera

Vi har eit speilreflekskamera som ikkje er heilt friskt. Av og til, får vi feilkode "Err 99", og dette gjer at vi eigentleg ikkje nyttar kameraet så mykje som vi kanskje elles ville gjort. Det er trist når ein ikkje får til dei blinkskota ein ser ein har høve til.

Eg prøvde å lasta ned nokre nye drivarar i dag, men det hjalp diverre ikkje. Likevel, det vart nokre fine testbilete frå naturen rundt husveggane her:

Fridag for Even og Mamma

For snart to veker sidan (fredag 8. juni), hadde eg og Even fri frå barnehage og arbeid, og då eg kvelden før spurte han kva me skulle gjera på fridagen, hadde han svaret klart; gå tur til vatnet. Vi har eit vatn som ligg 2,5 - 3 km innover (oppover, eigentleg) i skogen her, og der er det fint å bada og grilla om sommaren og å isfiska og tenna bål om vinteren, ein veldig idyllisk plass. Eg lovte han at vi skulle gå dersom vi kom oss i veg i rett tid, for det var midt i varmeperioden, og eg makta ikkje tanken på å gå i den verste solsteika midt på dagen.

Dagen etter kom guten opp i halv åtte-tida, klar for tur, og litt før ni hadde vi pakka, smurt matpakke og lagt i veg oppover. Fyrste rast vart etter ca 20 minutt, på ein fin utsiktsplass før vi går inn i den litt djupare skogen. På vegen må vi gjennom to grinder og det er sauar på beite i marka,noko som er spennande for både liten og stor.

Å gå tur i lag med ein fireåring er ei oppleving i seg sjølv. Even har kronisk munndiaré (dei seier det er arveleg) og når den som er vaksen er opplagt, er det fantastisk mykje spennande ein kan prata om på ein slik tur. Vi fann spor, dyrebæsj, maurstiar, høyrde ulike fuglar, og etter kvart såg vi sanneleg både bjørnar, tigrar, villvetter, småtussar og hekser mellom trea i skogen ...

Etter å ha gått ein time totalt, var vi framme ved vatnet. Her sit Even på benken ved vatnet og planlegg fisking med "fiskestonga" han fann på vegen.
Han hadde òg med seg eit skosnøre i sekken som han knytte på pinnen han hadde funne, men det vart lite fisk av dette likevel. Men han skal definitivt ha poeng for innsatsen!

Guten hadde forresten hevda at han skulle bada, så klea forsvann fort, men den helt store badeseansen vart det ikkje, til det var det for kaldt i vatnet, men vassing og fisking med pinne vart det. Den noko dårlege biletekvaliteten skuldast forresten at eg hadde gløymd kamera, så alle bileta er teke med mobiltelefonen. Men dei gjev iallfall eit lite inntrykk av korleis det var på tur.











Etter ei stund med vassing, fisking og utforsking av området, tok vi fram matpakkene og kosa oss, og då me sat og åt, fekk vi storfint besøk. Desse var det litt vanskeleg å ta godt bilete av, då dei er ganske sky og lite villige til å posera for fotografen, så eg måtte knipsa i motlys.








Då me hadde vore ved vatnet ein times tid, syntest Even det var på tide å returnera, så då vart sekkene pakka att, og vi la i veg heimover. På heimturen var det òg mykje å sjå på og prata om, og det ser ut til at Even er av den typen som meiner at "vegen er målet", det viktigaste er å gå på tur, ikkje å koma fram dit ein skal. :)

Då vi kom heim var guten sliten, han ville sjå film, og det tok ikkje lang tid før vi fann han slik på sofaen:


Ein vellukka, men slitsam tur for ein liten gut!

tysdag, juni 19, 2007

Ferdig sommartopp!


Laurdag sendte eg sommartoppen til stemora mi, Synnøve i Trondheim, og i dag fekk eg MMS med biletet til venstre. Dette gjekk sanneleg raskt, og riktig lekkert vart det!

Tusen takk for hjelpa, Synnøve! Eg er kjempeimponert! Og kjempeglad! :) Reknar med mottakaren vert det òg.

laurdag, juni 16, 2007

Sommartopp


Eg har strikka ferdig sommartopp til Hulda i Mandarin Petit.
No manglar det ein heklekant i multifargar rundt halsringing, ermer og nedst på toppen, men for å få til det, må nok plagget overlatast i meir kyndige hender enn mine ... :)

torsdag, juni 14, 2007

Ridande rytter til hest

Even har prata om hest leeenge, og han har hatt lyst til å ri. Gjett om han vart glad då Tvistvold barnehage skulle på tur heim til den eine assistenten i barnehagen og ri på nordlandshest?

Må innrømma at eg var litt skeptisk til om Even var så tøff som han ga inntrykk av, så eg ba pent om å få lov å koma og sjå på når han rei. Det fekk eg, og sanneleg; guten var ein tøffing han! Det vart to turar på han, på to ulike hestar, og han såg eigentleg ut som om han passa på hesteryggen. Trur nok dette vert noko å bygga vidare på frametter!

måndag, juni 11, 2007

Bursdagsfeiring

Eg har hatt litt motstridande kjensler til datamaskina mi etter innspurten med bacheloroppgåva, og når det i tillegg har vore ei veke samanhengande med finver i Trøndelag, har bloggen vore det siste eg har hatt i tankane. Men eg har lovt å fortella om Den Store Dagen, og då meiner eg bursdagen, sjølv om det har vore fleire (mellom anna avslutninga etter oppgåveinnlevering, fyrste dag i ny jobb osb.)

Bursdagen min feira eg i lag med Tor Inge. Dagen byrja med gåveopning; Lasse og Ellen og ungane hadde sendt ei flott veske som eg tok i bruk med ein gong, og frå Ketil og Kari med famile fekk eg ei bok om "språkblomster" samla og nedteikna av Per Egil Hegge. Pappa og Synnøve hadde sett inn gåve på kontoen min, så dei betalte for bursdagsmiddagen seinare på kvelden. Dinest såg eg i Trønderavisa at eg vart 30 år (Tor Inge hadde sendt inn bilete og gratulasjon), og det var det visst mange som hadde sett, for så mange telefonar og tekstmeldingar trur eg aldri at eg har fått før.

I halv elleve-tida køyrde vi til Trondheim. Vi hadde leigd rom på Britannia Hotell frå laurdag til sundag. Det har vore min draum i 20 år å bu på nettopp det hotellet, så no syntest vi det var på tide. Då vi kom fram, vart eg gratulert med dagen, og vi tinga bord (via resepsjonen) på Jonatan til klokka 20 same kveld, og gjekk opp på rommet og pakka ut. Det er forresten utruleg mykje ein kan greie å ta med seg for ei einaste overnatting, men eg meiner det er betre å ha med for mykje enn forlite, spesielt når ein ikkje skal på fottur.

Etter innsjekking, traska vi rundt i Trondheims gater. Sommaren hadde kome, og det var fantastisk å gå i den byen eg er så glad i istrålande solskinn. I Ravnkloa tok vi årets fyrste kafé-utepils. Og det klokka to på dagen! Ikkje normalkost for oss som for det fyrste har mange ungar og for det andre bur i litt for lang gangavstand til næraste kafé.

Etter utepilsen tråla vi byen på kryss og tvers, og eg trur ikkje Tor Inge visste kor mange små og spennande butikkar eit kvinnemenneske kan finna på nokre få timar, men det var min bursdag, og han gjekk utan å mukka i alle butikkane.

Då vi kom attende til hotellet, møtte dette oss på bordet på rommet:
Ei halv flaske rødvin og gratulasjonar frå resepsjonen. Innhaldet i flaska vart fortært i badekaret; rein nyting ... Og ein fantastisk gest frå hotellet!

Klokka 20 gjekk vi ned på Jonatan. Der fekk me eit koseleg lite bord, og valde oss timianstekt biff frå menyen. Maten, omgivnadene og servicen var heilt topp! Til dessert valde Tor Inge vaniljebakt ananas og eg ville ha Creme Bruleé. Då desserten min kom på bordet, var han pynta med ein sterkt lysande isfakkel, og den vart servert med gratulasjonar frå servitøren. Sjølv eg vart litt forlegen med det same, men det gjekk raskt over. Alle ved naboborda gratulerte, og det vart rett så triveleg. Etterpå såg me på rekninga at desserten min hadde vore på huset si rekning, og då vart jo gleda endå større!

Kvelden vart avslutta i ro og mak på hotellrommet slik at me var opplagte til frukosten i Palmehaven dagen etter, og det trur eg er den mest fantastiske hotellfrukosten eg har ete så langt. Ein ting er iallfall sikkert; det vert fleire overnattingar på Britannia!

Elles: Bursdag har vore feira meir eller mindre heile veka, og det har kome gåver i fleng. Mellom anna desse: Frå Tor Inge og ungane fekk eg Bergansjakke (bukse er òg med i gåven, men dei hadde ikkje storleiken min i butikken. Slik er det å vere xtra small dame), og det er noko eg har ønska meg leeeenge, Oddvar ga meg ei bok om livet; "Det skal merkes at vi lever" av Johannes Møllehave og Benny Andersen, og laurdag 9. juni feira vi dagen min i lag med svigerfamilien, og sanneleg kom det ikkje gåver då òg! Alt frå Sheridan likør via turkis pute til slumreteppe og kjøleskapsmagnet. Eg er kjempefornøgd, og spekulerer på om eg skal feira 30-årsdag kvart år ...

(Og dersom nokon undrar over mangel på bilete: Eg trur eg ga kameraet ferie i lag med datamaskina. Biletet over er teke med mobilen)

Takk til alle som gjorde dagen (eller dagane) min flott!

laurdag, juni 02, 2007

Tjueti

I dag er eg tredve år!

Dagen feirast i Trondheim, og eg gler meg stort.